Հոգեւոր Հովիւ

ԱՐՏԱԿ ՔԱՀԱՆԱՅ ՔԷՀԵԱԵԱՆ

Արտակ Քահանայ ՔէհեաեանԱւազանի անունով Պետրոս, ծնած է Հալէպ 1956-ին: Ան զաւակն է Հալէպի արժանաշնորհ քահանաներէն՝ Տէր Ատոմ Ա. Քհնյ. Քէհեաեանին եւ երէցկին Վարդուհիին՝ ծնեալ Քէհեաեան: Յաճախած է Հալէպի Ազգ. Կիւլպէնկեան եւ Հայկազեան վարժարանները, ապա Քարէն Եփփէ Ազգ. Ճեմարան, որ աւարտած է 1975-ին:

Շարունակելով իր ուսումը Հալէպի համալսարանէն ներս, հետեւած է Գիւղատնտեսութեան, որ աւարտած է 1980-ին: 1983-ին Քուէյթի Ազգային Վարժարանի Հոգաբարձութիւնը հրաւիրուած է զինք պաշտօնավարելու, որպէս հայերէնի, հայոց պատմութեան,  թուաբանութեան եւ գիտութեան ուսուցիչ: 1990-ի Իրաքեան ներխուժումին, վերադարձած է Հալէպ, ուր մնացած է մինչեւ 1997:

1989-ին, ամուսնացած է Քուէյթաբնակ Թիւթիւնճի ընտանիքի դստեր՝ Մարալին հետ, եւ ունեցած երկու զաւակներ, Ատոմն ու Արինը:

1997-ին, Քուէյթի առաջին հոգեւոր հովիւ՝ Արժ. Տէր Պարոյր Ա. Քհնյ. Սարգիսեանի հանգստեան կոչուելուն պատճառով, Քուէյթի Ազգային Վարչութիւնը հրաւիրած է զինք քահանայական կոչումի: Շրջան մը Կիլիկիոյ Կաթողիկոսութեան Քահանայից դասարանը ուսանելէ ետք, ժամանած է Քուէյթ եւ 1998 Փետրուար 19-ին քահանայ ձեռնադրուած եւ օծուած է, օրուան առաջնորդ Գերշ. Տէր Օշական Եպիսկոպոս Չօլոյեանի ձեռամբ, վերակոչուելով Տէր Արտակ Քահանայ: Ձեռնադրութեան ընթացքին, խարտավիլակութեան պարտականութիւնը կատարած են նորընծային հայրը՝ Արժ. Տէր Ատոմ Աւագ Քահանայ Քէհեաեանը եւ գաղութի հիմնադիր հոգեւոր հովիւ՝ Արժ. Տէր Պարոյր Աւագ Քահանայ Սարգիսեանը:

2002 թուականին, Գերաշնորհ Տէր Եփրեմ Արք. Թապագեանի Կաթողիկոսական Փոխանորդութեան շրջանին, Ն.Ս.Օ.Տ.Տ. Արամ Ա. Կաթողիկոսի Հայրապետական կոնդակով արժանացած է քահանայական լանջախաչ կրելու իրաւունքին:

2010 թուականին, Գերաշնորհ Տէր Կորիւն Արք. Պապեանի Կաթողիկոսական Փոխանորդութեան շրջանին, Ն.Ս.Օ.Տ.Տ. Արամ Ա. Կաթողիկոսի Հայրապետական կոնդակով արժանացած է Ծաղկեալ Փիլոն կրելու իրաւունք:

Տէր Արտակ ձեռնադրութեան թուականէն ի վեր կը քահանայագործէ, որպէս գաղութիս հոգեւոր հովիւ եւ Կրօնի դասաւանդ ուսուցիչ Ազգային Վարժարանէն ներս:



P.O.Box: 8157,
Salmiyeh 22052 Kuwait

Հեռ.՝   +965 25614392
Ֆաքս՝ +965 25612618
Էլ. փոստ՝ 
prelacy@armenianprelacykw.org

Բաժանորդագուիլ նորութիւններուն

Կայքի ձեւավորումը եւ նախագծումը` Ayb Solutions