Կաթողիկոսական փոխանորդ

ԳԵՐԱՊԱՏԻՒ՝ ՏԷՐ ՄԱՍԻՍ
ԾԱՅՐԱԳՈՅՆ ՎԱՐԴԱՊԵՏ ԶՕՊՈՒԵԱՆ
ԿԱԹՈՂԻԿՈՍԱԿԱՆ ՓՈԽԱՆՈՐԴ

Մասիս Ծ. Վրդ. Զօպուեան Ծնած է 1975-ին, Պուրճ Համուտ, Լիբանան: Նախնական կրթութիւնը ստացած է Ազգ. Աբգարեան վարժարանի եւ ապա Հայ Կաթողիկէ Մեսրոպեան Գոլէճին մէջ: 1991-ին ընդունուած է Մեծի Տանն Կիլիկիոյ Կաթողիկոսութեան Դպրեվանքը, ուր եօթնամեայ ուսումնական ծրագիրը աւարտելէ ետք, կուսակրօն քահանայ ձեռնադրուած է 1997-ին, ձեռամբ՝ Գերշ. Տ. Սուրէն Արք. Գաթարոյեանին: Նշանակուած է Դպրեվանքի հսկիչ, ապա «Կիլիկիա» թանգարանի փոխ-տեսուչ ետքը՝ գաւազանակիր Վեհափառ Հայրապետին: Նոյն միջոցին հետեւած է հնագիտական դասընթացքներու, Պէյրութի Սան Ժոզէֆ համալսարանին մէջ:

Վեհափառ Հայրապետի տնօրինութեամբ մեկնած է Ֆրանսա, ուսանելու Սթրազպուրկի պետական աստուածաբանական համալսարանը: Ֆրանսայէն վերադարձին, նշանակուած է Բերիոյ թեմի Ճէզիրէի շրջանի առաջնորդական փոխանորդ: Երեք տարիներու ծառայութենէն ետք, նշանակուած է Դպրեվանքի փոխ-տեսուչ, ապա մէկուկէս տարի եղած է Յունաստան, Թեսաղոնիկէի հայ համայնքի հոգեւոր հովուութեան պաշտօնով:

Վերադառնալով Անթիլիաս, յաջորդաբար ստանձնած է «Կիլիկիա» թանգարանի տեսչութեան, Քրիստոնէական դաստիարակութեան բաժանմունքի վարիչի, քահանայից դասարանի վարիչի եւ Միջ-եկեղեցական յարաբերութեանց փոխ-վարիչի պաշտօնները: Միաժամանակ, եղած է Լիբանանի Սուրբ Գրոց Ընկերակցութեան, Միջին-արեւելքի «Քրիստոնեաներու Համախմբում» կազմակերպութեան, Լիբանանի պաղեստինցի գաղթականներու եւ Քրիստոնէական Միացեալ Կրօնական Դասագրքի Պատրաստութեան վարչութիւններու անդամ: Անդամ է նաեւ Մեծի Տանն Կիլիկիոյ Կաթողիկոսութեան Ազգային Կեդրոնական Վարչութեան Կրօնական Ժողովին եւ Տնօրէն Ժողովին:

Գերապատիւ Հայր Սուրբը Դեկտեմբեր 2013-ին նշանակուած է Քուէյթի եւ Շրջակայից Հայոց Թեմի Կաթողիկոսական Փոխանորդ:



P.O.Box: 8157,
Salmiyeh 22052 Kuwait

Հեռ.՝   +965 25614392
Ֆաքս՝ +965 25612618
Էլ. փոստ՝ 
prelacy@armenianprelacykw.org

Բաժանորդագուիլ նորութիւններուն

Կայքի ձեւավորումը եւ նախագծումը` Ayb Solutions